Vincent Mooren Komiek
Vincent Mooren veur väöl "Viefcent", is eine echte Remunjse jóng, es jongste oet ein nés van 11 kienjer gebaore oppe nuuj boelvaar in 1947, ein veurtreffelik wienjoar. Al van jongs aaf aan waas der al mit theater bezig. Zien allereerste optraeje, waas biej ‘t 100 jaorig besjtaon van pensionaat "St. Louis" in 1958 in de grootsjtad (jaowaal) Weert.
In 1964 bringt de grote helderzeende en regieseur Hans Cremers hem in ketak mit ziene kompaan en theaterbees Ton Bierbaum oftewaal "Bibi", om same in häöre eerste Bónte Aovend van de Sjtadsvasteloavesvereniging "D'n Uul" op te traeje in de grootse vertolking van ein oerstjök : "Samson en Delila". De eerste veursjtelling waas ein feit en ein duuwoo waas gebaore "Bibi en Vincent". Het Herremenie Paviljoen in d'r tied waas te klein. Hiej haaj d'r zien eerste sukses gepreuf en geraoke. D’r zólle nog väöle optraejes volge.
Waem kint neet de kreasies die die twee in de loup van de tied gemaak höbbe? Zoas d’r zeen: "Maan Poor en Merie mit de Kallebas, De Sjtervende Mös en De Lame en de Blinje. Mit es kreuning op alles waat ze gedaon höbbe: ein heuse, echte 2 mansjoow in 1983 ter ere van het 22 jaorig bestaon van het duuwoo. Ouch höbbe ze van zich doon sjpreake biej ein anger Remunjs sjpektakel n.l. het Cirque-d'Hiver woo ze ein ech clowns(kloons)nummer brachte. Vincent ziene "echte" doorbraak kwaam biej de eerste oetveuring van de Remunjse Opera Bouffe Schinderhannes wao hae de rol van de Duuvel "Beëlzebub" vertolkte. Daonao kwame de vasteloaves-konzérs van het LSO aan de beurt. Waat veur hem aanleiding woor om in Leverkuse (D) zang en danslesse te gaon volge biej Frau Szabovski. Hae mós en zol wiejer. Zien interesse waerde verlag nao ‘t get serieuzere rippertwaar: Operettes en Musikals. Zien operette debuut deed d'r in 1980 biej Operette vereniging Euridice in Remunj en waal speelde hae de rol van "Sigismund" in Benatzki's "Im Weissen Rössl" onger de regie van Leo Decker. Mit deze man wirkt d'r toet oppe daag van vandaag nog altied same. Dus al meer es 20 jaor.
Zien rippertwaar is inmiddels opgelaope toet meer es 20 Operettes en Musikals. Door de jaore haer waerde hem versjillende rolle aangebaoje, die hem op veuraansjtaonde podia in Europa brachte, zo es der zeen: Amsterdam, Düsseldorf, Hamburg Luxemburg en Brussel. Zo waas hae versjillende keren te gast biej Opera- en Operette Vereniging "Orpheus" in zien gebaortesjtad Remunj en biej de Nederlands-Vlaamse Volks-Opera in Mestreech tiejens de bevrijdingsfeeste in 1995. Dao sjpeelde hae de sjwingende en tepdansende ober "Rudy" in "Hello Dolly" onger André Presser en regie van Frans Meeuwis.
Noch in ‘t zelfje jaor ein anger grandioos produksie:"Die Fledermaus" van Johan Strauss. Ein bienao op zien lief gesjreve rol: Gerichtdiener Frosch. Meer es 30 veurstellinge in gans Pruuses en Zwitserland. Ein van zien hoogtepunte toet noe toe, waas waal ein oetnödiging in 1996 veur de Xantener-Festspiele in Pruuses, wo hae in de aaj romeinse arena zien mitwirking verleende aan "My Fair Lady" mit de Staatopera van Lotz oet Pole. Volges hem ein oetzonjerlikke ervaring. In detzelfde jaor geit der op toernee mit "Der Vogelhändler" in samewirking mit de Opera-Nova ouch oet Pole. Oetgebrach door Arena-Theater oet Pruuses.
Op 28 februari 2002 kump ‘t berich, det ziene kompaan, Bibi, plots is gestórve. Ein verluus veur hem en veur groot Remunj.
"noojt gein theater meer..."
In 2002 waas der te zeen in "Der Bettelstudent" in versjillende theaters en in mei sjtong der weer op de plenk in Remunj es heks in de bekinde al eerder geneumde "Schinderhannes".
In het theater-sezoen 2002-2003 waas hae gekontrakteerd veur "Das Land des Lächelns" van Franz Lehár. Hiej haet d’r de rol van Obereunuchen gedoan. Mit dees Operette waas d’r ouch te gas in Remunj, zien gebaortestjad en waal op 23 november in de Oranjerie.
Op 18-19-20 juli 2003 waas d’r te zeen in Johan Strauss "Wienerblut" biej de Sommerfestspiele in het romeins amphitheater in Xanten. 3 versjillende rolle in ein stöck.
Het sezoen 2004-2005 is ein zwaor jaor. Geliek 2 produksies aan ein sjtök. "Die Zirkusprinsessin" en Anatevka (Fiddler on the roof) Mit dees létste produksie waas der ouch in Luxemburg te zeen, en waal op het "Festival de Wiltz".
In de wintjer sjteit "Gräfin Mariza" op ‘t program. Veur de miense die dette wille goan bekieke, is Alsdorf (Würselen-Aachen)(D) ut dunste biej en waal op 29 december 2005.
Het theater-sezoen 2006-2007 waerd geäöpend mit "Das Land des Lächelns" van Franz Lehár. Hiej geit d’r de rol van Obereunuchen weer doon. Det waerd weer lache...........
Eind augustus 2007 sjtông "Der Vogelhändler" biej de Xantener Festspiele op ‘t program.
Op 14 december 2007 is de première van "Der Zarewitsch" van Franz Lehar in Stuttgart, woonao en womit d’r op toernee geit toet eind jannewarie 2008